અમદાવાદ: અદાણી સમૂહની પાવર કંપની અને ભારતના ખાનગી ક્ષેત્રની સૌથી મોટી થર્મલ પાવર ઉત્પાદક અદાણી પાવર લિમિટેડ (APL) એ નાણાકીય વર્ષ ૨૦૨૬-૨૭ના પ્રથમ ત્રિમાસિક ગાળા (Q1 FY27) માટેના ઉત્કૃષ્ટ નાણાકીય પરિણામો જાહેર કર્યા છે. દેશમાં વીજળીની અભૂતપૂર્વ માંગ વચ્ચે કંપનીએ અત્યાર સુધીનું સર્વશ્રેષ્ઠ પ્રદર્શન કર્યું છે.
મે ૨૦૨૬માં દેશમાં વીજળીની માંગ ૨૭૦.૮ ગિગાવોટની ઐતિહાસિક સપાટીએ પહોંચતા ઊર્જા વપરાશ વાર્ષિક ધોરણે ૮.૪% વધીને ૪૮૫.૪ બિલિયન યુનિટ નોંધાયો હતો. આ સાનુકૂળ વાતાવરણ વચ્ચે અદાણી પાવરે સમીક્ષા હેઠળના ગાળામાં વાર્ષિક ધોરણે ૩૩%ના વધારા સાથે રૂ. ૧૯,૩૨૨ કરોડની કુલ એકીકૃત આવક મેળવી છે. જ્યારે કંપનીનો કર બાદનો ચોખ્ખો નફો (PAT) ૪૭.૨% ના મજબૂત ઉછાળા સાથે રૂ. ૪,૮૬૭ કરોડ થયો છે, જે અગાઉના વર્ષના સમાન ગાળામાં રૂ. ૩,૩૦૫ કરોડ હતો.
સમીક્ષા હેઠળના ગાળા દરમિયાન અદાણી પાવરે રૂ. ૬,૯૮૩ કરોડનો મજબૂત એકીકૃત એબીટડા (EBITDA) હાંસલ કર્યો છે, જે વાર્ષિક ધોરણે ૨૧.૬%ની વૃદ્ધિ દર્શાવે છે. આ ઉચ્ચ નફાકારકતા વધતા સંચાલકીય ખર્ચ છતાં કંપનીના ઉત્કૃષ્ટ કાર્યક્ષમ સંચાલનને આભારી છે. કંપનીનું એકીકૃત વીજ વેચાણ વોલ્યુમ પણ ૧૬.૯% વધીને ૨૮.૮ બિલિયન યુનિટ થયું છે.
પરિણામો અંગે કંપનીના સીઈઓ શ્રી એસ. બી. ખ્યાલિયાએ જણાવ્યું હતું કે, “અદાણી પાવરે તેના કાર્યક્ષમ અને સ્પર્ધાત્મક પોર્ટફોલિયોના બળે સર્વોચ્ચ પરિણામો પ્રાપ્ત કર્યા છે. કંપની તેના ૪૫ ગિગાવોટના લક્ષ્યાંક તરફ મજબૂત રીતે આગળ વધી રહી છે. જયપ્રકાશ એસોસિએટ્સની વીજ અસ્ક્યામતોના સફળ હસ્તાંતરણથી અમારી ક્ષમતા વધુ વિસ્તરી છે. અમે ભારતની વધતી જતી વીજ જરૂરિયાતોને પહોંચી વળવા સંપૂર્ણ પ્રતિબદ્ધ છીએ.”
બ્રાન્ડ ફાઇનાન્સના તાજેતરના અહેવાલ મુજબ, અદાણી પાવર દેશની સૌથી મૂલ્યવાન એનર્જી બ્રાન્ડ્સમાં પ્રથમ ક્રમે અને એકંદરે ભારતીય બ્રાન્ડ્સમાં ૮મા સ્થાને રહી છે. કંપનીના ક્ષમતા વિસ્તરણ હેઠળ ૧,૩૨૦ મેગાવોટનો કોરબા ફેઝ-II પ્રોજેક્ટ ચાલુ વર્ષમાં અને ૧,૬૦૦ મેગાવોટનો મહાન ફેઝ-II પ્રોજેક્ટ નાણાકીય વર્ષ ૨૮ના પ્રથમ ત્રિમાસિક ગાળામાં કાર્યરત થશે, જ્યારે રાયપુર અને રાયગઢ પ્રોજેક્ટ્સની કામગીરી પણ ઝડપથી આગળ વધી રહી છે.
