અમદાવાદઃ અદાણી ગ્રુપે આગામી 5 વર્ષમાં વાર્ષિક આશરે 2 લાખ કરોડના રોકાણની જાહેરાત કરી છે, જે કુલ 10 લાખ કરોડ સુધી પહોંચે છે. આ રોકાણને વૈશ્વિક વેપાર નકશા પર ભારતનું સ્થાન સ્થાપિત કરવા માટે મહત્વપૂર્ણ માનવામાં આવે છે. ઉડ્ડયન, બંદરો, લોજિસ્ટિક્સ, સિમેન્ટ અને ડિજિટલ ઈન્ફ્રાસ્ટ્રક્ચર જેવા વિવિધ ક્ષેત્રોમાં વિકાસ માટે બ્લુપ્રિન્ટ તૈયાર કરવામાં આવી છે.
2030 સુધીમાં એરપોર્ટ ક્ષમતા ૨૦ કરોડ મુસાફરો અને કાર્ગો હેન્ડલિંગ 1200 MMT સુધી વધારવાનો લક્ષ્યાંક છે. આ રોકાણનો નોંધપાત્ર હિસ્સો ગુજરાતમાં આવશે, ખાસ કરીને કચ્છના ખાવડામાં વિશ્વનો સૌથી મોટો નવીનીકરણીય ઉર્જા પાર્ક. આ પ્રોજેક્ટ ગુજરાતને ગ્રીન હાઇડ્રોજન અને સૌર ઉત્પાદન માટે વૈશ્વિક કેન્દ્ર બનાવશે. તે રાજ્યમાં માળખાગત સુવિધા વિકસાવશે અને આશરે 100000 નોકરીઓનું સર્જન કરશે.
ભારત હાલમાં ક્રૂડ ઓઇલ અને કુદરતી ગેસ માટે આયાત પર ભારે આધાર રાખે છે. આ સમસ્યાનો ઉકેલ લાવવા માટે, અદાણી ગ્રુપ 2030 સુધીમાં 50 GW નવીનીકરણીય ઉર્જા ક્ષમતાનું નિર્માણ કરવાની યોજના ધરાવે છે. વધુમાં, ₹1.5 લાખ કરોડના ખર્ચે હાઇ-વોલ્ટેજ ટ્રાન્સમિશન નેટવર્ક બનાવવામાં આવશે. આ પ્રોજેક્ટ્સ MSME ક્ષેત્ર માટે નવી તકો પણ લાવશે, જેમ કે જાળવણી, પુરવઠા અને લોજિસ્ટિક્સમાં મોટા પાયે રોજગાર.
