ધર્મનગરી બનારસ અને અહીંની પરંપરા અનોખી છે. અહીં અનોખાં આયોજનો થતાં હોય છે. પહેલી એપ્રિલ જગતઆખામાં વિશ્વ મૂર્ખ દિવસના રૂપમાં ઊજવાય છે ત્યારે બનારસમાં આ દિવસની અનોખી ઉજવણી થાય છે.
અહીં મોટા-મોટા બુદ્ધિજીવીઓ મૂરખ બનીને એ મેળાવડામાં સામેલ થાય છે અને મૂરખો જેવી હરકતો કરે છે. આ મેળામાં દુલ્હો દુલ્હનનો વેશ ધારણ કરે છે અને દુલ્હન દુલ્હાનો. અગડમ-બગડમ મંત્રોચ્ચાર કરીને તેમની લગ્નવિધિ કરાવવામાં આવે છે અને આ જ મેળામાં લગ્ન તૂટી પણ જાય છે.
જોકે આ મેળાની શરૂઆત પણ અનોખા અવાજથી થાય છે. ગર્દભ હોંચી-હોંચી કરતો હોય એવા અવાજ સાથે મેળાનો શુભારંભ થાય છે. આ બધું વારાણસીના ડો. રાજેન્દ્ર પ્રસાદ ઘાટ પર થાય છે. આ વર્ષે પણ મહામૂર્ખ સંમેલન ભરાયેલું જે લગાતાર 57મું વર્ષ હતું.
આ કાર્યક્રમમાં કાશીની આગવી નૃત્ય-પરંપરાઓની પ્રસ્તુતિ ઉપરાંત જાગૃતિ-કાર્યક્રમો પણ થયા. સાઇબર ઠગોથી બચવા માટે શું કરવું એ વિશેની માહિતી પોલીસે આપી હતી જેથી લોકો ફરીથી મૂરખ ન બને. આ ઉપરાંત હાસ્યકવિઓ અને કલાકારોને થીમ અનુસાર ભેટમાં હાથકડી, દુપટ્ટા કે સ્મૃતિચિહનો આપવામાં આવ્યા હતા.
