અમદાવાદ ગ્રામ્ય પોલીસે ગેરકાયદેસર રીતે સંચાલિત બે ફટાકડાના ગોડાઉન પર મોટી કાર્યવાહી કરતા અંદાજે 39.57 કરોડ રૂપિયા કિંમતના ફટાકડાનો વિશાળ જથ્થો જપ્ત કર્યો છે. આ મામલે સ્થળ પરથી બે લોકોને ધરપકડ કરવામાં આવી છે. પોલીસના જણાવ્યા અનુસાર ચાંગોદર પોલીસ સ્ટેશન વિસ્તારમાં મોડસર ગામથી અમાથાપુર જવાના માર્ગ પાસે આવેલા અંબિકા ટ્રેડ લિંક નામના ગોડાઉનમાં ગેરકાયદેસર રીતે મોટી માત્રામાં ફટાકડાનો સંગ્રહ કરવામાં આવ્યો હોવાની માહિતી મળી હતી. ત્યારબાદ પોલીસે દરોડો પાડ્યો હતો.
તપાસ દરમિયાન સામસામે આવેલા બે ગોડાઉનમાંથી કુલ 65954 બોક્સ વિવિધ પ્રકારના ફટાકડા મળી આવ્યા. પોલીસના જણાવ્યા મુજબ આ ફટાકડાની અંદાજિત કિંમત 39.57 કરોડ રૂપિયા છે. તપાસમાં એ પણ સામે આવ્યું કે ગોડાઉનનું લાઇસન્સ માર્ચ મહિનામાં જ સમાપ્ત થઈ ગયું હતું, પરંતુ તેનું નવીનીકરણ કરાવવામાં આવ્યું નહોતું. તેમ છતાં ત્યાં મોટી માત્રામાં વિસ્ફોટક સામગ્રી રાખવામાં આવી હતી.
કોઈપણ સમયે થઈ શકતો હતો મોટો અકસ્માત
પોલીસે તપાસમાં જોયું કે ગોડાઉનમાં આગથી બચાવ માટે ફાયર એક્સ્ટિંગ્વિશર, રેતી ભરેલી ડોલીઓ અને ફાયર વોટર પાઇપ જેવી કેટલીક વ્યવસ્થાઓ ઉપલબ્ધ હતી, પરંતુ આટલા મોટા પ્રમાણમાં રાખવામાં આવેલા ફટાકડાઓની સરખામણીએ સુરક્ષા વ્યવસ્થાઓ ખૂબ જ અપૂરતી હતી. આ ઉપરાંત ગોડાઉનની બહાર ટીન શેડ નીચે પણ ફટાકડાનો સંગ્રહ કરવામાં આવ્યો હતો, જેના કારણે કોઈપણ સમયે મોટો અકસ્માત થઈ શકે તેમ હતો. ચાંગોદર પોલીસે લાઇસન્સ ધારક અમિત મોદી અને ગોડાઉન મેનેજર કિશન પટેલ વિરુદ્ધ ભારતીય ન્યાય સંહિતા (BNS) ની કલમ 125 અને 288 તેમજ વિસ્ફોટક અધિનિયમની કલમ 9B(1)(b) અને 12 હેઠળ એફઆઈઆર નોંધી બંનેની ધરપકડ કરી લીધી છે. મામલાની આગળની તપાસ ચાલુ છે.
