મુંબઈ, ૨૦ જુલાઈ, ૨૦૨૬: BMCએ ગુરુવારે ધારાવી પુનર્વિકાસ પ્રોજેક્ટ (DRP) માટે ધારાવી BEST બસ ડેપોની જમીન હસ્તાંતરિત કરવાની મંજૂરી આપી છે, જેનાથી ૧૧.૫૮ એકરના આ સ્થળના પુનર્વિકાસનો માર્ગ મોકળો થયો છે.
કુલ જમીનમાંથી ૨.૩૫ એકર જમીન BESTની માલિકીની છે, જ્યારે બાકીનો વિસ્તાર જિલ્લા કલેક્ટરના અધિકારક્ષેત્ર હેઠળ છે. પુનર્વિકાસ માટે પ્રોજેક્ટની સ્પેશિયલ પર્પઝ વ્હીકલ (SPV) ‘ANDPL’ (પૂર્વવર્તી NMDPL) ને સોંપતા પહેલા, આ સમગ્ર જમીન મહારાષ્ટ્ર સરકારના DRP/SRA ને હસ્તાંતરિત કરવામાં આવશે.
માહિમ નેચર પાર્ક સામે આવેલા હાલના ડેપોમાં લગભગ ૨૯૦ બસો માટે જગ્યા છે. હાલમાં, આ સુવિધામાંથી આશરે ૧૨૦ બસોનું સંચાલન થાય છે. પુનર્વિકાસ દરમિયાન કામચલાઉ ડેપોમાંથી બસ સેવાઓ કોઈપણ અવરોધ વિના ચાલુ રહેશે. પ્રોજેક્ટના એક અધિકારીએ જણાવ્યું હતું કે, “પુનર્વિકાસ પ્રોજેક્ટમાં ધારાવીની અંદર બે નવા બહુમાળી બસ ડેપોની જોગવાઈ છે. એક ડેપો સાયન રેલ્વે સ્ટેશન પાસે અને બીજો ટાટા પાવર રિસીવિંગ સ્ટેશન પાસે બનાવવામાં આવશે. બંને મળીને લગભગ ૪૭૦ બસોને સમાવી શકશે, જેનાથી BESTની સંચાલન ક્ષમતામાં નોંધપાત્ર વધારો થશે.”
SPV નવા ડેપોનું માળખું (ઇન્ફ્રાસ્ટ્રક્ચર) તૈયાર કરશે, જેમાં વહીવટી ઇમારતો, ઇલેક્ટ્રિક બસ ચાર્જિંગ સુવિધાઓ અને અન્ય સંચાલકીય માળખાકીય સુવિધાઓનો સમાવેશ થાય છે. તે સિવિલ કામો, યુટિલિટીઝ અને અન્ય આવશ્યક માળખાગત સુવિધાઓને આવરી લેતા પાંચ વર્ષના ‘ડિફેક્ટ લાયબિલિટી પિરિયડ’ (ક્ષતિ જવાબદારી સમયગાળો) હેઠળ કામ પૂર્ણ થયા પછી પાંચ વર્ષ સુધી બંને ડેપોની જાળવણી પણ કરશે.
આ બે ડેપો ઇલેક્ટ્રિક બસો માટે હબ તરીકે કામ કરશે કારણ કે BEST તેના કાફલામાં વધુ ઇલેક્ટ્રિક બસોનો ઉમેરો કરી રહ્યું છે. આ પગલું દેશની આયાતી ઇંધણ પરની નિર્ભરતા ઘટાડવાના અને દેશને વધુ હરિત (પર્યાવરણ-અનુકૂળ) બનાવવાની વડાપ્રધાનની દૂરંદેશીને અનુરૂપ છે. ડેપોમાં નવી સુવિધાઓને કારણે જગ્યાનો વધુ સારો ઉપયોગ, બસ કાફલાનું બહેતર સંચાલન અને સંચાલન ખર્ચમાં ઘટાડો શક્ય બનશે, જેનાથી BESTની એકંદર સેવાની કાર્યક્ષમતા મજબૂત થશે. અધિકારીએ કહ્યું, “જમીન મહારાષ્ટ્ર સરકારના DRP/SRA પાસે જ રહેશે.
ટેન્ડરની શરતો મુજબ, SPV એ DRP/SRA ને લાગુ પડતા ‘રેડી રેકનર રેટ’ના ૨૫% જેટલું જમીન પ્રીમિયમ ચૂકવવું પડશે.”
