શુક્રવારે સવારે ટેકનિકલ ખામીને કારણે દિલ્હીના ઈન્દિરા ગાંધી ઈન્ટરનેશનલ એરપોર્ટ (IGI એરપોર્ટ) પર હવાઈ સેવા પ્રભાવિત થઈ હતી. IGI એરપોર્ટ પર એર ટ્રાફિક કંટ્રોલ (ATC) સિસ્ટમમાં ટેકનિકલ ખામી સર્જાઈ છે. જેના કારણે 300 જેટલી ફ્લાઈટ મોડી પડી હતી. ઈન્ડિગો, એર ઈન્ડિયા, સ્પાઈસજેટ અને અકાસા એરએ જણાવ્યું હતું કે એર ટ્રાફિક કંટ્રોલ સિસ્ટમમાં સમસ્યાઓના કારણે દિલ્હી એરપોર્ટ પર તેમની ફ્લાઈટ્સ મોડી થઈ રહી છે.
સૂત્રોના જણાવ્યા અનુસાર, ગુરુવાર સાંજથી એર ટ્રાફિક કંટ્રોલર્સ ફ્લાઇટના ફ્લાઈટ પ્લાન ઓટોમેટિક મેળવી શકતા નથી. ઓટોમેટિક મેસેજ સ્વિચિંગ સિસ્ટમ (AMSS) માં સમસ્યા આવી છે, જે ઓટો ટ્રેક સિસ્ટમ (AMS) ને માહિતી પૂરી પાડે છે.
આ સિસ્ટમમાં ખામીઓને કારણે, એર ટ્રાફિક કંટ્રોલર્સને હવે ફ્લાઇટ પ્લાન જાતે જ તૈયાર કરવા પડશે, જેના કારણે પ્રક્રિયામાં વધુ સમય લાગી રહ્યો છે, તેથી ઘણી ફ્લાઇટ્સ મોડી ઉપડી રહી છે. છે. જેના કારણે એરપોર્ટ પર ટ્રાફિક વધી ગયો હતો અને મુસાફરોને લાંબો સમય રાહ જોવી પડી હતી.
અધિકારીઓનું કહેવું છે કે ટેકનિકલ ટીમ સમસ્યાને ઠીક કરવામાં વ્યસ્ત છે. તમને જણાવી દઈએ કે દેશના સૌથી વ્યસ્ત એરપોર્ટમાંથી એક એવા દિલ્હી એરપોર્ટ પરથી દરરોજ લગભગ 1,500 ફ્લાઈટ્સ ઓપરેટ થાય છે. સ્પાઈસ જેટ સહિત અનેક એરલાઈન્સની ફ્લાઈટને અસર થઈ છે.
એરપોર્ટ ઓથોરિટી ઓફ ઈન્ડિયા (AAI) એ ટ્વિટર પર એક પોસ્ટમાં જણાવ્યું હતું કે, એર ટ્રાફિક કંટ્રોલ ડેટાને સપોર્ટ કરતી ઓટોમેટિક મેસેજ સ્વિચિંગ સિસ્ટમ (AMSS)માં ટેકનિકલ ખામીને કારણે દિલ્હી એરપોર્ટ પર ફ્લાઈટ ઓપરેશનમાં વિલંબ થઈ રહ્યો છે. હાલમાં, નિયંત્રકો ફ્લાઇટ પ્લાનની જાતે જ પ્રક્રિયા કરી રહ્યા છે, જેના કારણે થોડો વિલંબ થઈ રહ્યો છે. ટેકનિકલ ટીમો શક્ય તેટલી વહેલી તકે સિસ્ટમને ઠીક કરવા માટે કામ કરી રહી છે.
તે જ સમયે, દિલ્હી એરપોર્ટ દ્વારા જારી કરાયેલ સત્તાવાર એડવાઈઝરીમાં કહેવામાં આવ્યું હતું કે, ‘ATC સિસ્ટમમાં તકનીકી સમસ્યાને કારણે, IGI એરપોર્ટ પર ફ્લાઈટ ઓપરેશનમાં વિલંબ થઈ રહ્યો છે. સમસ્યાનો ઝડપથી ઉકેલ લાવવા અમારી ટીમ DIAL સહિત તમામ સંબંધિત એજન્સીઓ સાથે કામ કરી રહી છે. મુસાફરોને વિનંતી કરવામાં આવે છે કે તેઓ તેમની સંબંધિત એરલાઇન્સ તરફથી અપડેટ્સ માટે તપાસ કરતા રહે. આ અસુવિધા માટે અમે દિલગીર છીએ.’
ફ્લાઈટ ટ્રેકિંગ વેબસાઈટ flightradar24.com અનુસાર, લગભગ 300 ફ્લાઈટ્સ મોડી પડી છે અને દિલ્હી એરપોર્ટ પરથી ઉડતી ફ્લાઈટ્સ સરેરાશ 60 મિનિટ મોડી પડી છે.
