મહારાષ્ટ્રમાં ભાષાના વિવાદ વચ્ચે રાજ ઠાકરેની આગેવાની હેઠળની MNSનો ડર સામે આવ્યો છે. મીરા રોડ, પાલઘર, મુંબઈ લોકલ ટ્રેન, વિક્રોલી અને ઘાટકોપરમાં ભાષા વિવાદ બાદ ગુજરાતી બોર્ડ બદલીને મરાઠી કરવાનો મામલો સામે આવ્યો છે. ગુજરાત ભાજપના ધારાસભ્ય વિરેન્દ્ર બહાદુર સિંહ જાડેજાને MNS કાર્યકર્તાઓ દ્વારા તેમની ઓફિસના બોર્ડ મરાઠીમાં બનાવવાની ધમકી આપવામાં આવી હતી. ભાજપના ધારાસભ્યએ હવે તેમની મુંબઈ ઓફિસનું બોર્ડ બદલીને મરાઠી અને ગુજરાતી ભાષામાં કરી દીધું છે. વીરેન્દ્ર બહાદુર સિંહ ગુજરાતના કચ્છ જિલ્લાના રાપર વિધાનસભા મત વિસ્તારના ધારાસભ્ય છે.
આખું બોર્ડ ગુજરાતીમાં હતું
મુંબઈમાં હિન્દી-મરાઠી ભાષાના વિવાદ વચ્ચે, જ્યારે MNS કાર્યકર્તાઓએ નવી મુંબઈમાં ગુજરાતી ભાષામાં એક બોર્ડ જોયું તો તેઓએ બોર્ડને મરાઠીમાં બદલવાની ચેતવણી આપી. ગુજરાત ભાજપના ધારાસભ્યએ સીવુડ્સના સેક્ટર 42માં જનસંપર્ક કાર્યાલય ખોલ્યું છે. સીવુડ્સમાં મનસેની ચેતવણીના થોડા કલાકોમાં, ગુજરાતી સાઇનબોર્ડને મરાઠીમાં બદલી નાખવામાં આવ્યું હતું. બોર્ડ બદલવા અંગે ધારાસભ્ય તરફથી કોઈ પ્રતિક્રિયા આવી નથી.
MLA ક્ષત્રિય સમાજના આગેવાન છે
કચ્છના રાપરના ધારાસભ્ય વીરેન્દ્ર બહાદુરસિંહ જાડેજા પણ કચ્છ રાજપૂત ક્ષત્રિય સભાના પ્રમુખ છે. મુંબઈ સહિત સમગ્ર મહારાષ્ટ્રમાં MNS કાર્યકર્તાઓએ બિન-મરાઠી ભાષી લોકોને નિશાન બનાવ્યાની ઘટનાઓ સામે આવી છે. રાજ ઠાકરેએ મીરા ભાઈંદરમાં એક રેલીમાં ઘોષણા કરી હતી કે જો રાજ્યમાં હિન્દી બળજબરીથી લાદવામાં આવશે તો તેઓ શાળાઓ બંધ કરી દેશે. જોકે, ભાષાના નામે લોકોમાં નફરત ફેલાવવા બદલ રાજ ઠાકરે વિરુદ્ધ મહારાષ્ટ્ર પોલીસમાં ફરિયાદ દાખલ કરવામાં આવી છે. આ સાથે જ સુપ્રીમ કોર્ટમાં એક પીઆઈએલ પણ દાખલ કરવામાં આવી છે.
