જેલમાં બંધ ઠગ સુકેશ ચંદ્રશેખરે IPL ફ્રેન્ચાઇઝ રોયલ ચેલેન્જર્સ બેંગ્લોર (RCB) ના માલિકી હકો ખરીદવાની ઓફર કરી છે. સુકેશે તેમની કંપની LS હોલ્ડિંગ્સ વતી RCB ના માલિક ડિયાજિયોને લખેલા પત્રમાં 1 બિલિયન યુએસ ડોલરની ઓફર કરી હતી. તેમણે એવો પણ દાવો કર્યો હતો કે તેઓ પુણે સ્થિત ઉદ્યોગપતિ અદાર પૂનાવાલા કરતાં વધુ સારી ઓફર કરી શકે છે.
RCB ની માલિકી ધરાવતી કંપની ડિયાજિયોને લખેલા પત્રમાં સુકેશ ચંદ્રશેખરે જણાવ્યું હતું કે તેમની કંપની, LS હોલ્ડિંગ્સ, RCB ને સંપૂર્ણપણે હસ્તગત કરવામાં અને તેના સંચાલનનું નિયંત્રણ લેવામાં રસ ધરાવે છે. તેમણે જણાવ્યું હતું કે તેમની કંપની RCB માટે 1 બિલિયન યુએસ ડોલર (આશરે ₹8,300 કરોડ) ઓફર કરે છે. આ સોદો સંપૂર્ણપણે રોકડ આધારિત હશે. આ સોદામાં ફ્રેન્ચાઇઝી સંબંધિત તમામ અધિકારો, ટ્રેડમાર્ક્સ, ખેલાડી કરારો અને કાનૂની અધિકારો શામેલ હશે.
48 કલાકમાં ડીલ ફાઈનલ કરશેઃ સુકેશ
સુકેશે પોતાના પત્રમાં આગળ લખ્યું છે કે મને માહિતી મળી છે કે તમને મારી ઓફર કરતા બમણી રકમમાં RCB ખરીદવાની ઓફર મળી છે પરંતુ મારી ઓફર એકદમ સાચી છે. તેમણે દાવો કર્યો હતો કે તેમની કંપની કોઈપણ તૃતીય પક્ષના સહયોગ વિના 48 કલાકની અંદર ડીલને અંતિમ સ્વરૂપ આપશે.
પત્રમાં, સુકેશે પોતાના પર રહેલા કાનૂની કેસોનો પણ ઉલ્લેખ કર્યો હતો. તેમણે કહ્યું હતું કે, “મારી સામેના બધા કેસ ફક્ત આરોપો છે. કોઈપણ કોર્ટમાં કંઈ સાબિત થયું નથી.” તેમણે એવો પણ દાવો કર્યો હતો કે LS હોલ્ડિંગ્સ અંગે કોઈ કાનૂની વિવાદ નથી અને કંપની ઘણા દેશોમાં નોંધાયેલ અને કાર્યરત છે.
આ જેક્લીન માટે ભેટ હશે: સુકેશ ચંદ્રશેખર
સુકેશે પોતાના પત્રમાં બોલિવૂડ અભિનેત્રી જેક્લીન ફર્નાન્ડીઝનો પણ ઉલ્લેખ કર્યો હતો. તેમણે કહ્યું હતું કે ટીમ ખરીદવી એ તેમના સાથી જેક્લીન ફર્નાન્ડીઝ માટે ભેટ હશે. જોકે, RCBની માલિકી ધરાવતી કંપની ડિયાજિયો તરફથી સુકેશના પત્રનો કોઈ જવાબ મળ્યો નથી.
24 ડિસેમ્બરના રોજ જેકલીનને લખેલા પત્રમાં, સુકેશે આરસીબી ખરીદવાનો પણ ઉલ્લેખ કર્યો હતો. તેણે જણાવ્યું હતું કે તે આઈપીએલ ટીમની માલિકી મેળવવાનો પ્રયાસ કરી રહ્યો છે અને આરસીબી માટે બોલી લગાવી ચૂક્યો છે. તેને આશા હતી કે ભગવાનના આશીર્વાદથી તે સફળ થશે. અંતે, સુકેશે જેકલીન માટે પોતાનો ઊંડો અફસોસ વ્યક્ત કર્યો અને તેને ટૂંક સમયમાં મળવાનું વચન આપ્યું.
