હજારો વિદ્યાર્થીઓ બાંગ્લાદેશમાં કેમ કરી રહ્યા છે વિરોધ, આ આંદોલન વડાપ્રધાન શેખ હસીનાની સત્તારૂઢ અવામી લીગ માટે સૌથી મોટો પડકાર બની ગયો. સ્થાનિક મીડિયાના અહેવાલો અનુસાર, વડા પ્રધાન શેખ હસીનાએ તેમના પદ પરથી રાજીનામું આપી દીધું અને સેનાના હેલિકોપ્ટરમાં દેશ છોડી દીધો. બીજી તરફ, વિરોધીઓએ સોમવારે રાજધાની ઢાકામાં રેલી યોજવાની યોજના તૈયાર કરી છે. આ પહેલા દેશમાં ફાટી નીકળેલી હિંસાને કારણે ઘણા લોકોના મોત થયા હતા. દરમિયાન, બાંગ્લાદેશમાં, સેનાએ કર્ફ્યુ લાદી દીધો છે અને અશાંતિને કાબૂમાં લેવા માટે સત્તાવાળાઓએ ઇન્ટરનેટ સેવાઓને અવરોધિત કરી છે.
દેખાવકારો અને પોલીસ વચ્ચેની અથડામણમાં 300 લોકોના મોત થયા હતા
આ પહેલા રવિવારે પ્રદર્શનકારીઓ અને પોલીસ વચ્ચેની અથડામણમાં લગભગ 300 લોકો માર્યા ગયા હતા. તમને જણાવી દઈએ કે તાજેતરમાં બાંગ્લાદેશમાં પોલીસ અને વિદ્યાર્થી પ્રદર્શનકારીઓ વચ્ચે હિંસક અથડામણ થઈ છે. વાસ્તવમાં વિરોધ કરી રહેલા વિદ્યાર્થીઓ વિવાદાસ્પદ અનામત પ્રથા નાબૂદ કરવાની માંગ કરી રહ્યા છે. આ અંતર્ગત વર્ષ 1971માં બાંગ્લાદેશની આઝાદી માટે લડનારા સ્વાતંત્ર્ય સેનાનીઓના પરિવારો માટે 30 ટકા સરકારી નોકરીઓ અનામત રાખવામાં આવી છે.
આ રીતે તોફાનોની આગ ફાટી નીકળી
વિરોધ કરી રહેલા વિદ્યાર્થીઓની દલીલ છે કે શેખ હસીનાની પાર્ટી અવામી લીગ સાથે જોડાયેલા લોકોને વર્તમાન અનામત નિયમોનો લાભ મળી રહ્યો છે. આ અંગે પ્રદર્શનકારીઓએ શેખ હસીના સરકાર પ્રત્યે અસંતોષ વ્યક્ત કર્યો છે. સરકારે બાંગ્લાદેશમાં શાળા-કોલેજો બંધ કરવાનો નિર્ણય લીધો છે. આ પછી પણ દેશમાં ફેલાયેલી અશાંતિને કાબૂમાં લેવામાં સરકાર નિષ્ફળ સાબિત થઈ. બીજી તરફ અનામતને લઈને સુપ્રીમ કોર્ટના નિર્ણયથી આંદોલનકારીઓ પણ નારાજ દેખાઈ રહ્યા છે. આંદોલનકારીઓની માંગ છે કે સ્વાતંત્ર્ય સેનાનીઓના પરિવારોને સરકારી નોકરીઓમાં આપવામાં આવતી અનામત સંપૂર્ણપણે નાબૂદ કરવામાં આવે. બાંગ્લાદેશના ભૂતપૂર્વ આર્મી ચીફ ઈકબાલ કરીમે પ્રદર્શનકારીઓ વિરુદ્ધ ઉઠાવવામાં આવેલા પગલાંને લઈને સરકારની આકરી ટીકા કરી છે. આ દરમિયાન વર્તમાન આર્મી ચીફે દેખાવકારોને સમર્થન આપ્યું છે અને તેના કારણે દેશમાં રમખાણોની આગ વધુ ભડકી છે.
શું હિંસા ફાટી નીકળવા પાછળ પાકિસ્તાનની ISI છે?
હવે સવાલ એ છે કે શું બાંગ્લાદેશમાં થયેલી હિંસા પાછળ પાકિસ્તાની સેના અને ગુપ્તચર સંસ્થા ઈન્ટર સર્વિસ ઈન્ટેલિજન્સ (ISI)નો હાથ છે? બાંગ્લાદેશમાં ‘છાત્ર શિવીર’ નામના વિદ્યાર્થી સંગઠને હિંસા ભડકાવી હોવાનું જાણવા મળ્યું છે. આ વિદ્યાર્થી સંગઠન બાંગ્લાદેશમાં પ્રતિબંધિત સંગઠન જમાત-એ-ઈસ્લામીની શાખા છે. કહેવાય છે કે જમાત-એ-ઈસ્લામીને પાકિસ્તાનની આઈએસઆઈનું સમર્થન છે. બીજી તરફ, બાંગ્લાદેશ સરકાર તપાસ કરી રહી છે કે શું ISIએ પણ વર્તમાન પરિસ્થિતિમાં હસ્તક્ષેપ કર્યો છે.
