સુરતમાં આજે શિવરાત્રી દરમિયાન સંખ્યાબંધ શિવ મંદિરોમાં શિવરાત્રીની ઉજવણી ભારે શ્રધ્ધા અને ઉત્સાહથી કરવામાં આવી છે. તેમાં પણ કોટ વિસ્તાર એવા ગોપીપુરાની રામજીની પોળમાં આવેલું શિવ મંદિર કોટ વિસ્તારના લોકો માટે શિવરાત્રી દરમિયાન આસ્થાનું પ્રતિક બની જાય છે. આ દિવસે મંદિરનું શિવલિંગ દૂધ અને ભાંગનો પ્રસાદ બનાવવામાં આવે છે તે તપેલામાં શિવલિંગ તરે છે. આ તરતા શિવલિંગના દર્શન કરવા માટે કોટ વિસ્તારના સુરતીઓ મોટી સંખ્યામાં આવે છે. વર્ષમાં એક જ વખત આ શિવલીંગ તરતુ હોવાથી આ મંદિર પ્રત્યે લોકોની શ્રદ્ધા વધુ જોવા મળી રહી છે.
ઐતિહાસિક નગરી એવું સુરત અનેક ઇતિહાસ ધરબીને બેઠું છે તેમાં પણ ધાર્મિક દ્રષ્ટિએ સુરતનું અનેરુ મહત્વ જોવા આવે છે. આજે સુરતનો વિસ્તાર વધ્યો છે પરંતુ સદીઓ પહેલાં સુરત એટલે કોટ વિસ્તાર ગણાતું હતું. આ કોટ વિસ્તારમાં અનેક ઐતિહાસિક મંદિરો આવ્યા છે તેમાંનું એક મંદિર સુરતના ગોપીપુરા રામજીની પોળ વિસ્તારમાં આવેલું કોટી લિંગ મહાદેવનું મંદિર છે. આ વિસ્તારના લોકો માટે આ મંદિરનું કાયમી મહત્વ છે પરંતુ શિવરાત્રીના દિવસે આ મંદિરનું મહત્વ કોટ વિસ્તારના સુરતીઓ માટે અનેકગણું વધી જાય છે.
તેનું કારણ ધરાવતા 72 વર્ષના પૂજારી રાજેશ સ્માર્ટ કહે છે અમારા બાપ દાદાના વખતથી આ મંદિરની સેવા અમે કરીએ છીએ. આ મંદિર ઘણું જ પૌરાણિક છે તેની સાથે સાથે દર શિવરાત્રીએ મંદિરમાં શિવલિંગ છે. મંદિરમાં પંચમુખી મહાદેવ મંદિર નીચે શિવલિંગ છે. આ શિવલિંગ બહાર કાઢ્યું હતું તેની પૂજા કરીને મહાદેવજીનો પ્રસાદ છે તેવા દૂધ અને ભાંગથી બનાવવામાં આવે છે તેમાં આ શિવલીંગ મુકવામાં આવે છે અને તે આશ્ચર્યની વચ્ચે તરે છે. વર્ષમાં એક વાર તે પણ શિવરાત્રીના દિવસે મહાદેવ દૂધમાં તરે છે તેના દર્શન કરવા માટે સુરતીઓ ઉમટી પડતા હોય છે.
મહોલ્લાના લોકો કહે છે, વર્ષો પહેલાં અહીં શિવરાત્રીના દિવસે મેળો પણ યોજાતો હતો પરંતુ શહેરનો વિસ્તાર વધવાની સાથે અનેક લોકો કોટ વિસ્તાર છોડીને અન્ય વિસ્તારમાં વસવાટ કરવા ગયાં છે. જોકે, અન્ય વિસ્તારમાં ગયેલા લોકો પણ શિવરાત્રીના દિવસે કોટી લિંગ મહાદેવના દર્શન કરવા માટે ગોપીપુરા વિસ્તારમાં અચુક આવે છે.
