સુરતઃ મુંબઈના ગ્રાન્ટ રોડ પર આવેલી એક હોટલમાં ચોંકાવનારી ઘટના સામે આવી છે. સુરતમાં હીરાના કારખાનામાં મેનેજર તરીકે કામ કરતો એક શખ્સ સગીર યુવતીને ફસાવીને મુંબઈ લઈ ગયો હતો. હોટલમાં રહેવા માટે મેનેજરે સગીર યુવતીનું બનાવટી આધાર કાર્ડ પણ તૈયાર કર્યું હતું. જો કે જ્યારે હીરાના કારખાનાના મેનેજરે મુંબઈની એક હોટલમાં યુવતીને હવસનો શિકાર બનાવવાનો પ્રયાસ કર્યો ત્યારે તેનું મોત થયું હતું. વાયગ્રાના ઓવરડોઝને કારણે ફેક્ટરી મેનેજરનું મોત થયું હોવાનું પોલીસ તપાસમાં બહાર આવ્યું છે.
અગાઉ એવું માનવામાં આવતું હતું કે આરોપીનું મૃત્યુ હાર્ટ એટેકથી થયું છે, પરંતુ પોલીસ કહી રહી છે કે મૃત્યુ યૌન ક્ષમતા વધારવા માટે લીધેલી દવાને કારણે થયું છે. પોલીસે હોટલમાં બનેલી ઘટનાની તપાસ શરૂ કરી છે અને સગીર યુવતીની માતાની ફરિયાદના આધારે કેસ પણ નોંધ્યો છે.
મુંબઈ ફરાવવાની લાલચ આપી હતી
એક અહેવાલ મુજબ, સુરતનો એક વ્યક્તિ 2 નવેમ્બરે સગીર યુવતીને મુંબઈ ફરવા લઈ જવાના બહાને હોટલમાં લઈ ગયો હતો. પીડિત યુવતીની ઉંમર 14 વર્ષ છે. તે હીરાના કારખાનામાં કામ કરે છે. જે કે તે એ વાતથી અજાણ હતી કે મેનેજર સગીરને ખોટા ઈરાદાથી મુંબઈ લઈ ગયો હતો. મેનેજરે 2 નવેમ્બરે સાંજે 4 વાગ્યે હોટલમાં ચેક ઇન કર્યું હતું. રિપોર્ટ અનુસાર, તેણે હોટલના અધિકારીઓને કહ્યું કે યુવતી તેની પુત્રી છે. સગીર યુવતીના પિતાને લકવાગ્રસ્ત હોવાનું પણ સામે આવ્યું છે. હીરાના કારખાનાનો સંચાલક સગીર યુવતીના પરિવારને આર્થિક મદદ કરતો હતો.
બળજબરીથી સેક્સના પ્રયાસને કારણે મૃત્યુ
કારખાનાના સંચાલકે હોટલમાં સગીર યુવતી સાથે બળજબરીથી શારીરિક સંબંધ બાંધવાનો પ્રયાસ કર્યો હતો. સગીર યુવતીએ વિરોધ કરતાં તેણે તેની સાથે મારપીટ પણ કરી હતી. થોડા સમય પછી, તે પોતે બેભાન થઈ ગયો. સગીરે આ ઘટના અંગે હોટલ સત્તાવાળાઓને જાણ કરી હતી. આ પછી મુંબઈના ડીબી માર્ગ પોલીસ સ્ટેશને પહોંચીને તપાસ શરૂ કરી હતી. પોલીસને રૂમમાંથી કેટલીક વસ્તુઓ મળી છે જેનો ઉપયોગ જાતીય ક્ષમતા વધારવા માટે કરવામાં આવ્યો છે. પોલીસે મૃતદેહને પોસ્ટમોર્ટમ માટે મોકલી આપ્યો હતો, જો કે, વિસેરા તપાસ માટે સાચવવામાં આવશે.
