ભારતીય ઉદ્યોગપતિ અને ટાટા સન્સના માનદ ચેરમેન રતન ટાટા 1937માં મુંબઈમાં જન્મ્યા હતા. તેમણે 25 વર્ષની ઉંમરે ટાટા ગ્રુપમાં પોતાની કારકિર્દીની શરૂઆત કરી હતી. રતન ટાટાના સંઘર્ષની ઘણી વાતો છે. જેમાં તેમણે ટાટા સ્ટીલમાં ભઠ્ઠીમાં ચૂનો નાખવાનું કામ પણ કર્યું હતું.
દેશના પ્રખ્યાત ઉદ્યોગપતિ રતન ટાટા હવે આ દુનિયામાં નથી. ટાટા સન્સના ચેરમેન એમેરિટસ રતન ટાટાની હાલત ગંભીર હતી અને તેમને મુંબઈની હોસ્પિટલમાં દાખલ કરવામાં આવ્યા હતા. જ્યાં દિગ્ગજ ઉદ્યોગપતિનું અવસાન થયું હતું. ટાટા ગ્રૂપે એક નિવેદન જારી કરીને કહ્યું કે, ‘આ અમારા માટે બહુ મોટું નુકસાન છે’. દરમિયાન આજે તેમના પાર્થિવ દેહને રાષ્ટ્રધ્વજમાં લપેટી NCPA લૉન ખાતે જાહેર જનતાને અંતિમ દર્શન માટે મુકાયો હતો અને હવે સાંજે 4 વાગ્યા પછી વરલી સ્મશાન ગૃહમાં અંતિમ સંસ્કાર કરવામાં આવશે.
2008 માં, રતન ટાટાને ભારત સરકાર દ્વારા પદ્મ વિભૂષણથી નવાજવામાં આવ્યા હતા, જે દેશનો બીજો સર્વોચ્ચ નાગરિક પુરસ્કાર છે. ડિસેમ્બર 2012માં, તેમણે ટાટા ગ્રુપમાં 50 વર્ષ પછી ટાટા સન્સના ચેરમેન પદેથી રાજીનામું આપ્યું. આ પછી રતન ‘ટાટા સન્સ’ના માનદ પ્રમુખ બન્યા.
રતન ટાટાનો જન્મ 28 ડિસેમ્બર 1937ના રોજ મુંબઈમાં નવલ ટાટા અને સુની ટાટાને ત્યાં થયો હતો. તેઓ દેશના પ્રતિષ્ઠિત ટાટા પરિવારનો ભાગ હતા. તેમણે 25 વર્ષની ઉંમરે ટાટા ગ્રુપમાં પોતાની કારકિર્દીની શરૂઆત કરી હતી. રતન ટાટાનો ઉછેર તેમની દાદી લેડી નવાઝબાઈ દ્વારા દસ વર્ષની ઉંમર સુધી ટાટા પેલેસમાં થયો હતો.
ટાટા સ્ટીલની ભઠ્ઠીમાં લાઈમસ્ટોન નાખવાનું કામ કર્યું
અમેરિકન ટેક જાયન્ટ IBM સાથે નોકરીની ઓફર હોવા છતાં, ટાટાએ ભારત પાછા ફરવાનું નક્કી કર્યું અને ટાટા સ્ટીલ સાથે તેમની કારકિર્દીની શરૂઆત કરી. તેમના પરિવારના સભ્યો કંપનીના માલિક હતા, પરંતુ તેમણે એક સામાન્ય કર્મચારી તરીકે કંપનીમાં કામ કરવાનું શરૂ કર્યું. તેમણે ટાટા સ્ટીલ પ્લાન્ટમાં ભઠ્ઠીઓમાં ચૂનાના પત્થર નાખવા જેવું કામ પણ કર્યું.
રતન ટાટાને વિમાનો અને કાર ઉડાવવાનો શોખ હતો
રતન ટાટાને ફ્લાઈંગનો ખૂબ શોખ હતો. તેઓ 2007માં F-16 ફાલ્કન ઉડાવનાર પ્રથમ ભારતીય બન્યા હતા. તેને કારનો પણ ઘણો શોખ હતો. તેમના કલેક્શનમાં મસેરાટી ક્વાટ્રોપોર્ટ, મર્સિડીઝ બેન્ઝ એસ-ક્લાસ, મર્સિડીઝ બેન્ઝ 500 એસએલ અને જગુઆર એફ-ટાઈપ જેવી કારનો સમાવેશ થાય છે.
ફોર્ડ કંપનીના ચેરમેને રતન ટાટાનું અપમાન કર્યું
90ના દાયકામાં જ્યારે ટાટા ગ્રુપે તેની કાર લોન્ચ કરી ત્યારે કંપનીનું વેચાણ અપેક્ષાઓ પર ખરું નહોતું આવ્યું. તે સમયે ટાટા ગ્રુપે ટાટા મોટર્સના પેસેન્જર કાર ડિવિઝનને વેચવાનો નિર્ણય કર્યો જે પડકારોનો સામનો કરી રહી હતી. આ માટે રતન ટાટાએ અમેરિકન કાર મેન્યુફેક્ચરિંગ કંપની ફોર્ડ મોટર્સના ચેરમેન બિલ ફોર્ડ સાથે વાત કરી હતી. વાતચીત દરમિયાન બિલ ફોર્ડે તેની મજાક ઉડાવી અને કહ્યું કે તમને કંઈ ખબર નથી, તમે પેસેન્જર કાર ડિવિઝન કેમ શરૂ કર્યું? જો હું આ સોદો કરું તો તે તમારા માટે એક મોટો ઉપકાર હશે. ફોર્ડના ચેરમેનના આ શબ્દોથી રતન ટાટાને ઘણું દુઃખ થયું હતું પરંતુ તેમણે તે વ્યક્ત કર્યું ન હતું. તે પછી તેણે પેસેન્જર કાર ડિવિઝનને વેચવાનો નિર્ણય મોકૂફ રાખ્યો અને તેની પોતાની શૈલીમાં તેમની પાસેથી બદલો લીધો.
નવ વર્ષ પછી રતન ટાટાએ આ રીતે અપમાનનો બદલો લીધો
ફોર્ડ સાથેનો સોદો મુલતવી રાખ્યા પછી, રતન ટાટા ઘરે પાછા ફર્યા અને ટાટા મોટર્સના કાર વિભાગ પર ધ્યાન કેન્દ્રિત કર્યું અને તેને ખૂબ ઊંચાઈ પર લઈ ગયા. ફોર્ડના વડા સાથેની વાતચીતના લગભગ નવ વર્ષ બાદ ટાટા મોટર્સની કારોએ સમગ્ર વિશ્વમાં પોતાની ઓળખ બનાવી હતી. કંપનીની કાર વિશ્વની સૌથી વધુ વેચાતી શ્રેણીમાં સામેલ હતી. બીજી તરફ ફોર્ડ કંપનીની હાલત કફોડી બની રહી હતી. ટાટાએ ડૂબતી ફોર્ડ કંપનીને બહાર કાઢવાની જવાબદારી ઉપાડી અને સાથે સાથે નવ વર્ષ પહેલા કરેલા અપમાનનો બદલો પણ લીધો. હકીકતમાં, પડકારોનો સામનો કરી રહેલા ફોર્ડને બચાવવા માટે, રતન ટાટાએ તેની લોકપ્રિય બ્રાન્ડ્સ જગુઆર અને લેન્ડ રોવર ખરીદવાની ઓફર કરી હતી. પરંતુ અમેરિકા જવાને બદલે તેણે ફોર્ડના ચેરમેનને ડીલ માટે ભારત બોલાવ્યા.
