હિંદુ સમાજમાં લગ્નને બે અલગ-અલગ લોકો વચ્ચેના સાત જીવનનું મિલન માનવામાં આવે છે. કન્યા અને વરરાજા સાત જન્મ સાથે રહેવાનું વચન આપે છે અને સાત વચનો લે છે. પરંતુ જે રીતે સામાજિક પરિવર્તનો આવી રહ્યા છે તે જોતા એવું લાગે છે કે, આપણે સાત જન્મનો આ સંબંધ સાત વર્ષ સુધી જાળવી શક્યા નથી. કપલ તેમના અંગત જીવનથી એટલા પરેશાન થઈ જાય છે કે તેઓ તરત જ છૂટાછેડા માટે અરજી કરે છે. કેટલાક કિસ્સાઓમાં, લગ્નેતર સંબંધો અને ચીટીંગ કારણ તરીકે ટાંકવામાં આવે છે, જયારે કેટલાક કિસ્સાઓમાં, રોજિંદા બિનજરૂરી ઝઘડાને કારણો તરીકે દર્શાવવામાં આવે છે.
આ બાબતમાં મોટાભાગે છોકરીઓને ભોગવવું પડે છે. જો કે, પહેલા લોકો છૂટાછેડા પછી દુઃખી રહેતા હતા, હવે ઘણી છોકરીઓએ તેને પોતાની સ્વતંત્રતા સાથે જોડીને સેલિબ્રેશન કરવાનું શરૂ કર્યું છે. ક્યારેક સ્ત્રી છૂટાછેડાની પાર્ટી કરે છે તો ક્યારેક છૂટાછેડાનું ફોટોશૂટ કરાવે છે. પરંતુ હવે માર્કેટમાં છૂટાછેડાની મહેંદી પણ આવી ગઈ છે. આને લગતો એક વીડિયો સોશિયલ મીડિયા પર ઝડપથી વાયરલ થઈ રહ્યો છે.
છૂટાછેડાની મહેંદીના આ વાયરલ વીડિયોમાં તમે જોઈ શકો છો કે, એક મહિલાના હાથ પર મહેંદીની ૩ અલગ-અલગ ડિઝાઈન છે. હાથની ટોચ પર એક કપલ છે જે કાતરથી કાપીને અલગ કરવામાં આવ્યા છે. આ પછી, છૂટાછેડાના કારણોને સ્કેલમાં આપવામાં આવ્યા છે. જેમાં લખ્યું છે કે કપલમાં પ્રેમ બહુ ઓછો છે, અને ઝઘડા જ વધારે છે. આ મહેંદી જોતા એવું લાગે છે કે, યુવતીએ કદાચ રોજના આ ઝઘડાઓથી કંટાળીને છૂટાછેડા લેવાનું નક્કી કર્યું હશે. આ પછી, ત્રીજી તસવીર બનાવવામાં આવી છે, જેમાં એક ઘરને બે ભાગમાં વહેંચવામાં આવ્યું છે, જેની એક બાજુ છોકરો છે અને બીજી બાજુ છોકરી છે. આ ઘરની નીચે લખેલું છે, ‘ફાઇનલી છૂટાછેડા.’
આ છૂટાછેડાની મહેંદી ડિઝાઇન જયશ્રી પંચાલે સોશિયલ મીડિયા પર શેર કરી છે, જે મહેંદી ડિઝાઇનર છે. જયશ્રીએ વિડિયોનું કેપ્શન લખ્યું છે, ‘ફાઇનલી ફ્રી’. ઈન્સ્ટાગ્રામ પર આ વીડિયો ઘણો જોવામાં આવી રહ્યો છે. અત્યાર સુધીમાં આ વીડિયોને ૨૭ લાખથી વધુ વખત જોવામાં આવ્યો છે. તે જ સમયે, ૩૭ હજારથી વધુ લોકોએ તેને પસંદ કર્યો છે, જયારે હજારો લોકોએ આ વીડિયોને શેર કર્યો છે. આ સિવાય છૂટાછેડાની મહેંદીના આ વીડિયો પર લોકો કમેન્ટ પણ કરી રહ્યા છે. અત્યાર સુધીમાં લગભગ ૧ હજાર લોકોએ કમેન્ટ કરી છે.
વિડિયો પર કોમેન્ટ કરતાં ફલફીએ લખ્યું કે હું આ છૂટાછેડા વિશે વધારે જાણતી નથી, પરંતુ કલાકારનું કામ અદભુત છે. ડિઝાઇન અને વિગતો સુંદર છે, મારો મતલબ એ છે કે તે પરફેક્ટ છે .પછી ભલે તે છૂટાછેડા સાથે સંબંધિત હોય. દીપિકા ખન્નાએ ટિપ્પણી કરી છે કે, હું કલાકારની પ્રશંસા કરું છું. આશિયા બાનોએ લખ્યું છે કે અહીં લગ્નમાં પણ મહેંદી લગાવવામાં આવતી નથી, પરંતુ આ તો છૂટાછેડા વખતે જ મહેંદી લગાવી છે. વાહ આવા લોકો ક્યાંથી આવે છે?
