અરવિંદ ડી સિલ્વા
અરવિંદ ડી સિલ્વા ICC ફાઇનલમાં લક્ષ્યનો પીછો કરતી વખતે સદી ફટકારનાર પ્રથમ ખેલાડી હતા. શ્રીલંકાના ભૂતપૂર્વ કેપ્ટને 1996માં ઓસ્ટ્રેલિયા સામેની ODI વર્લ્ડ કપ ફાઇનલમાં 124 બોલમાં 13 ચોગ્ગાની મદદથી અણનમ 107 રન બનાવ્યા હતા. ઓસ્ટ્રેલિયાએ 242 રનનો લક્ષ્યાંક આપ્યો હતો, જે શ્રીલંકાએ 22 બોલ બાકી રહેતા પ્રાપ્ત કર્યો હતો. શ્રીલંકાની ટીમે 7 વિકેટે જીત મેળવી હતી.
ક્રિસ કેર્ન્સ
૨૦૦૦માં ભારત સામે આઈસીસી ચેમ્પિયન્સ ટ્રોફીની ફાઇનલમાં ન્યુઝીલેન્ડના ક્રિસ કેર્ન્સે ૧૧૩ બોલમાં અણનમ ૧૦૨ રન ફટકાર્યા હતા. તેમણે ૮ ચોગ્ગા અને ૨ છગ્ગા ફટકાર્યા હતા. ભારતે ૨૬૫ રનનો લક્ષ્યાંક રાખ્યો હતો અને ન્યુઝીલેન્ડે બે બોલ બાકી રહેતા ચાર વિકેટે જીત મેળવી હતી.
શેન વોટસન
આ યાદીમાં ત્રીજું નામ ઓસ્ટ્રેલિયાના ભૂતપૂર્વ ઓલરાઉન્ડર શેન વોટસનનું છે. તેમણે 2009માં ન્યૂઝીલેન્ડ સામે ICC ચેમ્પિયન્સ ટ્રોફીની ફાઇનલમાં અણનમ 105 રનની ઇનિંગ રમી હતી. ઓપનર તરીકે મેદાનમાં ઉતરતા, તેમણે 129 બોલનો સામનો કર્યો અને 10 ચોગ્ગા અને ચાર છગ્ગા ફટકાર્યા. ઓસ્ટ્રેલિયાએ 6 વિકેટે વિજય મેળવ્યો. ઓસ્ટ્રેલિયાએ 28 બોલ બાકી રહેતા 201 રનનો લક્ષ્યાંક હાંસલ કર્યો.
ટ્રેવિસ હેડ
ઓસ્ટ્રેલિયાના ખતરનાક બેટ્સમેન ટ્રેવિસ હેડે 2023ના ODI વર્લ્ડ કપની ફાઇનલમાં ભારત સામે સદી ફટકારી હતી. તેણે 241 રનના લક્ષ્યનો પીછો કરતી વખતે 120 બોલમાં 137 રન બનાવ્યા હતા. હેડે 15 ચોગ્ગા અને ચાર છગ્ગા ફટકાર્યા હતા. ઓસ્ટ્રેલિયાએ ટાઇટલ મેચ 6 વિકેટથી જીતી હતી.
એડેન માર્કરામ
દક્ષિણ આફ્રિકાના ઓપનર એડન માર્કરામ આ અનોખા ક્લબમાં નવી અને પાંચમી એન્ટ્રી કરી છે. માર્કરામએ ICC વર્લ્ડ ટેસ્ટ ચેમ્પિયનશિપ 2023-2025 ના ફાઇનલના ત્રીજા દિવસે 159 બોલમાં અણનમ 102 રન બનાવ્યા, જેમાં 11 ચોગ્ગાનો સમાવેશ થાય છે. ઓસ્ટ્રેલિયાએ લોર્ડ્સના મેદાન પર દક્ષિણ આફ્રિકા માટે 282 રનનો લક્ષ્યાંક રાખ્યો છે. દક્ષિણ આફ્રિકાની ટીમે હાલમાં બે વિકેટ ગુમાવીને 213 રન બનાવ્યા છે.
