પહેલગામમાં આતંકવાદી હુમલા પછી ભારત-પાકિસ્તાન વચ્ચે તણાવ વધી રહ્યો છે. વર્તમાન સંજોગોને ધ્યાને રાખી ‘ધ બોલિવૂડ બિગ શોટ યુકે ટૂર’ મુલતવી રાખવામાં આવશે.
આ ટુરમાં સલમાન ખાન અને માધુરી દિક્ષિતની સાથે ટાઈગર શ્રોફ, વરૂણ ધવન, દિશા પટાણી, ક્રિતિ સેનોન, સારા અલી ખાન, સુનિલ ગ્રોવર અને મનીષ પૌલ પણ જવાના હતા. ઓર્ગેનાઈઝર્સે ભારત-પાકિસ્તાન વચ્ચે વણસેલા સંબંધોનું કારણ દર્શાવી ટૂર મોકૂફ રાખી છે.
અગાઉના આયોજન મુજબ, માન્ચેસ્ટર ખાતે 4 મે અને લંડનમાં 5 મેના રોજ શો યોજાવાનો હતો. શોની તૈયારીના ભાગરૂપે એડવાન્સ બુકિંગ શરૂ થઈ ગયુ હતું અને બ્રિટિશએશિયન્સમાં ભારે ઉત્સાહ પણ હતો.
જોકે વર્તમાન સંજોગોમાં આ શોને રી-શિડ્યુલ કરવા માટે અનેક લોકોએ સૂચન કર્યું હતું. બદલાયેલા સંજોગોમાં આ શોને મોકૂફ રાખવાનું પગલું જ સૌથી વધુ જવાબદાર અને આદરપૂર્વકનું રહેશે, તેવું શોના ઓર્ગેનાઈઝર્સને લાગ્યુ હતું. શોને અગાઉની તારીખો મુજબ યોજવામાં આવે તો તેનાથી વિવાદ ઊભો થવાનું અને સંબંધિત સ્ટાર્સની પ્રતિષ્ઠા ખરડાવાનું જોખમ હતું.
બોલિવૂડ સ્ટાર્સને ચાહનારા લોકો યુકેમાં મોટી સંખ્યામાં છે. યુકેના એશિયન્સ ઉપરાંત સ્ટાર્સ પણ આ ટૂર માટે ઉત્સાહમાં હતા. અચાનક પરિસ્થિતિ બદલાઈ જતાં સ્ટાર્સને શો નહીં કરવાનું યોગ્ય લાગ્યું હતું. સલામતી તથા પોતાની પ્રતિષ્ઠાની દૃષ્ટિએ આ નિર્ણય યોગ્ય જણાતા સલમાન સહિતના સ્ટાર્સ અને ઓર્ગેનાઈઝર્સ વચ્ચે વાતચીત થઈ હતી.
આ શોને મુલતવી રાખવાનું ખૂબ અઘરુ હતું, કારણ કે ઘણી બધી ટિકિટો વેચાઈ ગઈ હતી. જો કે શો યથાવત રાખવાથી વિવાદની શક્યતા હતી. વળી, ભારતમાં નિર્દોષ પ્રવાસીઓની હત્યાના કારણે શોકનો માહોલ હોય ત્યારે મોતનો મલાજો રાખવો જોઈએ. ઓર્ગેનાઈઝર્સ અને ફિલ્મ સ્ટાર્સે વાતાવરણ શાંત થયા પચી ફરી ટૂર રાખવા સંમતિ દર્શાવી છે. શોની નવી તારીખો ટૂંક સમયમાં જાહેર થશે, પરંતુ તે પહેલાં એડવાનસ બૂકિંગ કરાવનારા ચાહકોને નાણાં પરત કરવાની કાર્યવાહી શરૂ થઈ છે.
