મુંબઈ: ધારાવી રીડેવલમેન્ટ સંદર્ભે ધારાવીમાં ચાલી રહેલા સર્વેક્ષણ માટે સમયમર્યાદા નક્કી કરવી એ સરકારી પ્રક્રિયાનો જ એક ભાગ છે, અને વિપક્ષે આ મુદ્દે રાજકારણ ન કરવું જોઈએ ,આ સીધી સલાહ ભૂતપૂર્વ સાંસદ રાહુલ શેવાળેએ સાંસદ વર્ષા ગાયકવાડને આપી હતી. સોશિયલ મીડિયા પ્લેટફોર્મ ‘X’ પર પોસ્ટ કરાયેલા એક ખુલ્લા પત્રમાં, શેવાળેએ ધારાવી રીડેવલપમેન્ટ પ્રોજેક્ટ સંબંધિત સર્વેક્ષણ પર પોતાનો અભિપ્રાય વ્યક્ત કર્યો.
પોતાના ખુલ્લા પત્રમાં, શેવાળેએ લખ્યું છે કે 40 વર્ષથી ધારાવી પર સંપૂર્ણ નિયંત્રણ હોવા છતાં, વિપક્ષ મહાયુતિ (મહાગઠબંધન) હાલની સરકારે જે હાંસલ કર્યું છે, તે પ્રાપ્ત કરવામાં તેઓ નિષ્ફળ ગઇ છે. તે બાબત જ વર્ષા ગાયકવાડની હતાશા પાછળનું કારણ છે.
ધારાવી રીડેવલપમેન્ટ પ્રોજેક્ટ આ પ્રકારનો એકમાત્ર પ્રોજેક્ટ છે જ્યાં “અયોગ્ય” રહેવાસીઓને પણ સ્થાન આપવામાં આવશે. અત્યાર સુધીમાં, સરકાર દ્વારા સંચાલિત આ સર્વેક્ષણ દ્વારા લગભગ 100,000 ઘરોને વૈજ્ઞાનિક રીતે નંબરો સાથે ચિહ્નિત કરવામાં આવ્યા છે, જે સ્થાનિક સમર્થન દર્શાવે છે. જો કે, જે સ્થાનિક લોકોએ રાજકીય પ્રેરણા અથવા વ્યક્તિગત કારણોસર હજુ સુધી સર્વેક્ષણમાં ભાગ લીધો નથી, તેઓને હવે યોગ્ય પ્રક્રિયા મુજબ કાનૂની કાર્યવાહીનો સામનો કરવો પડશે. સર્વેક્ષણમાં ભાગ લેવા માટે 15 એપ્રિલની અંતિમ તારીખ મનસ્વી રીતે નક્કી કરવામાં આવી ન હતી, તે સત્તાવાર પ્રક્રિયાનો જ એક ભાગ છે. વધુમાં, સરકારે મહત્તમ ભાગીદારી સુનિશ્ચિત કરવા માટે પહેલાથી જ સમયમર્યાદા ઘણી વખત લંબાવી હતી.
તેથી, વિપક્ષે આ મુદ્દે રાજકારણ કરીને ધારાવીના રહેવાસીઓમાં મૂંઝવણ ઉભી ન કરવી જોઈએ, તેમ શેવાળેએ સલાહ આપી હતી.
ધારાવી પુનર્વિકાસ પ્રોજેક્ટ ફક્ત રીડેવલપમેન્ટ પ્રયાસ નથી પરંતુ ધારાવીના લોકોના સર્વાંગી વિકાસ માટેનો પ્રયાસ છે. શેવાળેએ તેમના પત્રમાં એમ પણ જણાવ્યું હતું કે રાજ્ય સરકાર ધારાવીના દરેક રહેવાસીને ઘર પૂરું પાડવા માટે પ્રતિબદ્ધ છે.
તેમણે ઉમેર્યું કે, આ પ્રોજેક્ટ ધારાવીના રહેવાસીઓને તેમના ભવિષ્યને ઘડવાની તક આપે છે, અને કેટલાક વ્યક્તિઓ પર આરોપ મુકયો હતો કે, તેઓ રાજકીય લાભ માટે પ્રોજેક્ટમાં અવરોધ ઉભો કરવાનો પ્રયાસ કરી રહ્યા છે. શેવાળેએ ભારપૂર્વક જણાવ્યું હતું કે ધારાવીનો પુનર્વિકાસ ફક્ત એક વ્યક્તિનું સ્વપ્ન નથી, તે લાખો પરિવારોના ભવિષ્યની ચિંતા કરે છે. તેમણે ધારાવીના રહેવાસીઓને ખાતરી આપી હતી કે, કોઈપણ રાજકીય એજન્ડાને તેમના ઉજ્જવળ ભવિષ્યના માર્ગમાં આવવા દેવામાં આવશે નહીં.
