લખનૌ એરપોર્ટ પર કાર્ગો સામાનની સ્કેનિંગ દરમિયાન એક ડબ્બામાં નવજાત શિશુનો મૃતદેહ મળી આવતા ખળભળાટ મચી ગયો હતો. આ મામલે કુરિયર એજન્ટની પૂછપરછ કરવામાં આવી રહી છે.
રાજધાની લખનૌના ચૌધરી ચરણ સિંહ ઈન્ટરનેશનલ એરપોર્ટ પર મંગળવારે સવારે નવજાત શિશુનો મૃતદેહ મળી આવતા હંગામો મચી ગયો હતો. કુરિયર એજન્ટના સામાનના ડબ્બાની અંદરથી નવજાત બાળકની લાશ મળી આવતા કાર્ગો સ્ટાફમાં ગભરાટ ફેલાઈ ગયો હતો. સીઆઈએસએફને જાણ કર્યા બાદ તરત જ કાર્ગો સ્ટાફે કુરિયર માટે આવેલા યુવકને પકડીને સીઆઈએસએફને સોંપ્યો હતો. સીઆઈએસએફની પૂછપરછ દરમિયાન યુવક મૃતદેહ વિશે કંઈ કહી શક્યો ન હતો.
દરરોજની જેમ, લખનૌ એરપોર્ટ પર કાર્ગો સ્ટાફ મંગળવારે સવારે કાર્ગો માટે બુક કરવા માટેના સામાનને સ્કેન કરી રહ્યો હતો. દરમિયાન એક ખાનગી કંપનીનો કુરિયર એજન્ટ કાર્ગો મારફત માલ બુક કરાવવા આવ્યો હતો. જ્યારે કાર્ગો સ્ટાફે તેમના દ્વારા બુક કરાવેલા સામાનને સ્કેન કરવાનું શરૂ કર્યું ત્યારે સ્કેનિંગ મશીનમાં પ્લાસ્ટિકના બોક્સની અંદર નવજાત બાળકનો મૃતદેહ મળી આવ્યો હતો. જ્યારે કાર્ગો સ્ટાફે પેકેટ ખોલ્યું તો તેમાં લગભગ 1 મહિનાના બાળકનો મૃતદેહ મળી આવ્યો હતો. આ જોઈને કાર્ગો કર્મચારીઓ ચોંકી ઉઠ્યા હતા.
તરત જ આ માહિતી CISF અને પોલીસને પણ આપવામાં આવી હતી. હાલમાં કુરિયર કંપનીના કર્મચારી બોક્સ અને મૃતદેહ વિશે કોઈ માહિતી આપી શક્યા ન હતા. એરપોર્ટ આઉટપોસ્ટના ઈન્ચાર્જે જણાવ્યું કે લખનૌ એરપોર્ટ કાર્ગો કોમ્પ્લેક્સમાંથી નવજાત શિશુનો મૃતદેહ મળી આવ્યો છે અને જે વ્યક્તિ કુરિયર માટે આવ્યો હતો તેની પૂછપરછ કરવામાં આવી રહી છે. હાલમાં કોઈએ નવજાત શિશુના મૃતદેહને પરીક્ષણ માટે બોમ્બે મોકલ્યો હોવાનો મામલો સામે આવ્યો છે, પરંતુ કુરિયર એજન્ટ આ અંગેના કોઈ દસ્તાવેજો બતાવી શક્યા નથી.
