મુંબઈ-મહારાષ્ટ્રમાં ખાબકેલા વરસાદથી જાનમાલને વ્યાપક નુકશાન થયુ છે ત્યારે હવામાન વિભાગ દ્વારા મહારાષ્ટ્રનાં અનેક જીલ્લાઓમાં વધુ વરસાદની ચેતવણી આપવા સાથે રેડએલર્ટ જારી રહ્યું છે.
ભારતના આ વર્ષે નૈઋત્ય ચોમાસુ ઘણુ વહેલુ આવી જ ગયુ છે. કેરળ અને કર્ણાટકમાં એક સાથે પ્રવેશ કરી લીધા બાદ એક જ દિવસમાં મહારાષ્ટ્રમાં પહોંચી ગયુ હતું. મુંબઈ, પુના સહીત મહારાષ્ટ્રનાં અનેક ભાગોમાં ઝંઝાવાતી વરસાદ થયો હતો ભારે વરસાદથી જળબંબાકારની સ્થિતિ સર્જાવા સાથે સૌથી વધુ વરસાદનો 107 વર્ષનો રેકોર્ડ તૂટયો હતો.
માર્ગ રેલ વિમાની સેવા પ્રભાવીત થઈ હતી. માર્ગો પર કાર વાહનો ડુબેલી હાલતમાં જોવા મળ્યા હતા. હવામાન વિભાગ દ્વારા મુંબઈ થાણે રાયગઢ તથા રત્નાગીરી જીલ્લાઓમાં હજુ ભારે વરસાદનું રેડ એલર્ટ જારી કરાયુ છે.
હજુ બે દિવસ ભારે વરસાદનું એલર્ટ અપાયુ છે. મુંબઈમાં ભારે વરસાદ ત્રાટકવા સાથે વિજળી પડવાથી ચાર તથા અન્ય એકનું ડુબી જવાથી મોત નીપજયુ હતું.
હવામાન વિભાગે મુંબઈ ઉપરાંત દિલ્હી સહીત ઉતર ભારતનાં રાજયોમાં પણ હવામાન પલટાની આગાહી કરી છે તેજ પવન સાથે હળવો વરસાદ થવાનું અનુમાન દર્શાવવામાં આવ્યું છે. પૂર્વ પશ્ચિમી ઉતર પ્રદેશમાં ભારે પવન સાથે વરસાદની ચેતવણી આપવામાં આવી છે.
