- ફટાકડા વિસ્ફોટ કાંડ: આરોપીઓનું પોલીસ કાફલા સાથે રી-કન્ટ્રક્શન
- તપાસ માટે મધ્યપ્રદેશના ઇન્દોર ખાતે પણ લઈ જવામાં આવશે
ડીસા: ગેરકાયદેસર રીતે ચાલતી ફટાકડા ફેક્ટરીમાં બ્લાસ્ટ થતા 21 વ્યક્તિઓના મોત નીપજ્યાં હતા. જેમાં પોલીસે ફેક્ટરી માલિક પિતા પુત્રની ધરપકડ કરી કોર્ટમાંથી આઠ દિવસના રિમાન્ડ મેળવ્યા બાદ આજે બંનેને વિશાળ પોલીસ કાફલા સાથે ફેક્ટરી પર સ્થળ તપાસ માટે લઈ જવાયા હતા.
ડીસામાં ફટાકડા ફેક્ટરીમાં થયેલા બ્લાસ્ટ ના કારણે સમગ્ર સરકારી તંત્ર દોડતું થયું છે. ગેરકાયદેસર રીતે ચાલતી ફેક્ટરીમાં બ્લાસ્ટ થવાથી કામ કરી રહેલા 21 મજૂરોના મોત તેમજ પાંચ મજૂરોને ઈજા થઈ હતી. પોલીસે આ કેસમાં ફેક્ટરી માલિક દિપક ખુબચંદ મોહનાની અને ખૂબચંદ રેણૂમલ મોહનાનીની ધરપકડ કરી ગુરુવારે કોર્ટમાં રજૂ કરતા કોર્ટે તેઓને આઠ દિવસના રિમાન્ડ પર સોંપવાનો હુકમ કર્યો હતો.
જ્યારે બીજી તરફ સરકારે આ કેસની તપાસ માટે સ્પેશિયલ ઇન્વેસ્ટિગેશન ટીમની પણ રચના કરી છે જે ટીમે ગઈકાલથી પોતાની તપાસ શરૂ કરી દીધી છે.
જયારે પોલીસે પણ આરોપી પિતા પુત્રની તપાસ શરૂ કરી છે. જેમાં આજે શુક્રવારે બંનેને ડીસા તાલુકા પીઆઇ વી.જી. પ્રજાપતિ અને બનાસકાંઠા એલસીબી પીઆઇ એ.વી. દેસાઈ ની આગેવાની હેઠળ વિશાળ પોલીસ કાફલા સાથે તેઓની ફેક્ટરી પર લઈ જવાયા હતા. પોલીસે બંને પિતા પુત્રની બ્લાસ્ટ થયેલી જગ્યા તેમજ તેઓની ઓફિસે લઈ જઈ વિશેષ પૂછપરછ કરી હતી. આ કેસમાં બંનેને વધુ તપાસ માટે મધ્યપ્રદેશના ઇન્દોર ખાતે પણ લઈ જવામાં આવશે.
