અમદાવાદ: પાટણ જિલ્લાની મેડિકલ કોલેજમાં 18 વર્ષીય MBBS સ્ટુડન્ટનું રેગિંગ દરમિયાન કથિત રીતે ત્રણ કલાક ઊભા રહેવાથી મોત થયું હતું. એક પોલીસ અધિકારીએ માહિતી આપી હતી કે મેડિકલ કોલેજે શનિવારે બનેલી ઘટનાની તપાસ શરૂ કરી છે. રેગિંગની આ ઘટનામાં 15 વરિષ્ઠ વિદ્યાર્થીઓ વિરુદ્ધ કેસ નોંધવામાં આવ્યો છે. અત્યાર સુધીની તપાસમાં આ 15 વિદ્યાર્થીઓની સંડોવણી બહાર આવી છે.
3 કલાક ઊભો રહ્યો વિદ્યાર્થી
મૃતક વિદ્યાર્થીને તેના સિનિયર વિદ્યાર્થીઓએ લાંબા સમય સુધી ઊભા રહેવાની ફરજ પાડી હતી, જેના કારણે તે બેભાન થઈ ગયો હતો. તે કોલેજમાં એમબીબીએસના પ્રથમ વર્ષનો વિદ્યાર્થી હતો. પાટણના ધારપુરમાં આવેલી GMERS મેડિકલ કોલેજ અને હોસ્પિટલની હોસ્ટેલમાં શનિવારે રાત્રે આ ઘટના બની હતી. કોલેજના ડીન ડો. હાર્દિક શાહે જણાવ્યું હતું કે પીડિત વિદ્યાર્થી અનિલ મેથાનિયાને તેના સિનિયર વિદ્યાર્થીઓએ રેગિંગ દરમિયાન કથિત રીતે ત્રણ કલાક સુધી ઉભો રાખ્યો હતો, જેના કારણે તે બેભાન થઈ ગયો હતો અને તેનું મૃત્યુ થયું હતું.
હોસ્પિટલમાં થયું મૃત્યુ
ડૉ.હાર્દિક શાહે જણાવ્યું હતું કે જ્યારે અનિલ મેથાનિયા બેભાન થઈ ગયો ત્યારે તેને હોસ્પિટલ લઈ જવામાં આવ્યો, જ્યાં તેને બચાવવાના તમામ પ્રયાસો નિષ્ફળ ગયા અને તેને મૃત જાહેર કરવામાં આવ્યો. અનિલના સહપાઠીઓએ જણાવ્યું હતું કે કોલેજની હોસ્ટેલમાં સિનિયર વિદ્યાર્થીઓને પોતાનો પરિચય કરાવ્યા બાદ ત્રણ કલાક ઊભા રહીને તેનું મૃત્યુ થયું હતું. ડીને કહ્યું કે કોલેજની એન્ટિ-રેગિંગ કમિટીએ આ મામલે તપાસ શરૂ કરી દીધી છે અને જો વરિષ્ઠ વિદ્યાર્થીઓ રેગિંગ માટે જવાબદાર જણાશે તો તેમની સામે શિક્ષાત્મક પગલાં લેવામાં આવશે.
વરિષ્ઠ વિદ્યાર્થીઓના જૂથ દ્વારા ત્રાસ
બાલીસણા પોલીસ સ્ટેશનના એક અધિકારીએ જણાવ્યું કે વિદ્યાર્થીના મૃતદેહને પોસ્ટમોર્ટમ માટે મોકલી આપવામાં આવ્યો છે અને અકસ્માત મોતનો કેસ નોંધવામાં આવ્યો છે. કૉલેજના પ્રથમ વર્ષના MBBS વિદ્યાર્થીએ ઓળખ ન આપવાની શરતે જણાવ્યું હતું કે સાત-આઠ સિનિયર વિદ્યાર્થીઓએ જુનિયર વિદ્યાર્થીઓના જૂથને લગભગ ત્રણ કલાક ઊભા રહેવા અને એક પછી એક પોતાનો પરિચય આપવા દબાણ કર્યું હતું.
સરકાર પાસેથી ન્યાય મળવાની આશા
વિદ્યાર્થીએ કહ્યું કે તેઓએ અમને ઊભા રહેવા દબાણ કર્યું અને ગુસ્સે ન થવાનું કહ્યું. છેવટે અમારી સાથે ઊભેલો એક વિદ્યાર્થી બેહોશ થઈ ગયો. અમે તેને હોસ્પિટલ લઈ ગયા જ્યાં તેનું મૃત્યુ થયું. મેથાનિયાના સંબંધી ધર્મેન્દ્ર મેથાનિયાએ પત્રકારોને જણાવ્યું હતું કે પરિવારને કોલેજ અને સરકાર પાસેથી ન્યાય મળવાની આશા છે. તેમણે કહ્યું કે મને મારા કાકાનો ફોન આવ્યો કે મારા પિતરાઈ ભાઈને બેહોશ થઈ જતાં હોસ્પિટલમાં દાખલ કરવામાં આવ્યા છે. જ્યારે હું અહીં પહોંચ્યો ત્યારે મને ખબર પડી કે તે મૃત્યુ પામ્યો છે.
