સુપરસ્ટાર સલમાન ખાનને ધમકી આપનારને પકડવામાં મુંબઈની વર્લી પોલીસે મોટી સફળતા મેળવી છે. થોડા સમય પહેલા એક યુવકે સલમાનને ગેંગસ્ટર લોરેન્સ બિશ્નોઈના નામે ધમકી આપી હતી. સાથે જ 5 કરોડની ખંડણી પણ માંગી હતી. હવે તે યુવકની જમશેદપુરથી અટકાયત કરવામાં આવી છે.
કોણ છે ધમકી આપનાર વ્યક્તિ?
પોલીસ પાસેથી મળતી માહિતી મુજબ ધમકી આપનાર વ્યક્તિ શાકભાજી વેચવાનું કામ કરે છે. તેણે તાજેતરમાં ટીવી પર લોરેન્સ બિશ્નોઈ દ્વારા સલમાન ખાનને મારી નાખવાની ધમકી આપતા સમાચાર જોયા હતા. આ પછી તેને ખંડણીની માંગ કરવાનો વિચાર આવ્યો. વ્યક્તિએ મુંબઈ ટ્રાફિક પોલીસના વોટ્સએપ નંબર પર ધમકીભર્યો મેસેજ મોકલ્યો અને પછી તેનો મોબાઈલ સ્વીચ ઓફ કરી દીધો.
પકડાયેલ વ્યક્તિનું નામ શેખ છે અને તેની ઉંમર 24 વર્ષ છે. શેખે પોલીસને આપેલી માહિતી મુજબ, અગાઉ તે શાકભાજી વેચતો હતો, પરંતુ હાલમાં તે કંઈ કરતો નથી. મેસેજ કર્યા પછી શેખે માફી માંગતો મેસેજ મોકલ્યો. મુંબઈ ટ્રાફિક પોલીસને ધમકીભર્યો મેસેજ મળ્યા બાદ પોલીસે અજાણ્યા વ્યક્તિ વિરુદ્ધ કેસ નોંધીને તપાસ શરૂ કરી હતી.
પોલીસે આરોપીનો મોબાઈલ નંબર ટ્રેસ કરવાનો પ્રયાસ કર્યો હતો. પરંતુ નંબર સ્વીચ ઓફ હતો. મુંબઈ પોલીસ એ જાણવાનો પ્રયાસ કરી રહી હતી કે આ મેસેજ ક્યાંથી મોકલવામાં આવ્યો હતો. તેમને ખબર પડી કે જમશેદપુરથી મેસેજ આવ્યો હતો. જમશેદપુરમાં સ્થાનિક પોલીસની મદદથી તપાસ કરવામાં આવી હતી અને હવે મેસેજ મોકલનાર વ્યક્તિને કસ્ટડીમાં લેવામાં આવ્યો છે.
કયો મેસેજ મોકલ્યો હતો
આ વ્યક્તિએ તેના ધમકીભર્યા મેસેજમાં લોરેન્સ બિશ્નોઈ ગેંગનું નામ લીધું હતું અને સલમાન ખાન પાસેથી 5 કરોડ રૂપિયાની ખંડણી માંગી હતી. મેસેજમાં લખ્યું હતું, ‘આને હળવાશથી ન લો. જો સલમાન ખાને જીવિત રહેવું હોય અને લોરેન્સ બિશ્નોઈ સાથેની દુશ્મની ખતમ કરવી હોય તો તેણે 5 કરોડ રૂપિયા ચૂકવવા પડશે. જો પૈસા નહીં આપવામાં આવે તો સલમાન ખાનની હાલત બાબા સિદ્દીકી કરતા પણ ખરાબ થઈ જશે. મુંબઈ પોલીસે આ મેસેજને ખૂબ જ ગંભીરતાથી લીધો અને મામલાની તપાસ શરૂ કરી. ધમકી આપ્યા બાદ વ્યક્તિએ માફી માંગી હતી. મેસેજ મોકલનારનું કહેવું હતું કે તેણે આ મેસેજ ભૂલથી મોકલ્યો હતો અને તે બદલ તે દિલગીર છે.
સલમાનને ધમકીઓ મળી રહી છે
જાણવા મળે છે કે ગેંગસ્ટર લોરેન્સ બિશ્નોઈ તરફથી મળેલી ધમકી અને NCP નેતા બાબા સિદ્દીકીના મોતને પગલે સલમાન ખાનની સુરક્ષા વધુ કડક કરવામાં આવી છે. અભિનેતાને Y પ્લસ સુરક્ષા આપવામાં આવી છે, પરંતુ પોતાના જીવને ખતરો હોવા છતાં પણ સલમાન પોતાના કામના વચનો પૂરા કરી રહ્યો છે. સલમાન ખાને તાજેતરમાં જ બિગ બોસ 18ના વીકેન્ડ વોરનું શૂટિંગ કર્યું હતું. સેટ પર સલમાને કહ્યું કે કામ તો કરવું જ પડે છે, પ્રતિબદ્ધતાઓ પૂરી કરવી જરૂરી છે. આ સિવાય તે પોતાની ફિલ્મ ‘સિકંદર’ના શૂટિંગમાં પણ વ્યસ્ત છે.
